Yr wythnos hon, mae ColegauCymru yn falch o ddathlu #WythnosColegau2025, ymgyrch ledled y DU sy’n amlygu’r rôl hanfodol y mae colegau addysg bellach yn ei chwarae wrth lunio bywydau, cymunedau, a’r economi.
Mae'r ymgyrch yn canolbwyntio ar ystod o themâu, gan ddangos sut mae colegau'n cyfrannu at adeiladu dyfodol cryfach, tecach a gwyrddach. O gefnogi twf economaidd a chynaliadwyedd i feithrin cyfleoedd cynhwysol, mae colegau ledled Cymru yn parhau i gael effaith barhaus.
Dywedodd Prif Weithredwr ColegauCymru, David Hagendyk,
"Mae colegau yng Nghymru wrth galon datblygu sgiliau, arloesi, a thrawsnewid cymunedol. Mae #WythnosColegau2025 yn gyfle i arddangos y gwaith anhygoel sy'n digwydd ar draws y sector ac ymroddiad staff a dysgwyr fel ei gilydd."
Drwy gydol yr wythnos, byddwn yn edrych ar y gwahanol ffyrdd y mae ein colegau addysg bellach yn gwneud gwahaniaeth.
Mae ein colegau yn chwarae rhan hanfodol wrth ysgogi a chefnogi twf economaidd. Drwy ddarparu hyfforddiant sy’n berthnasol i’r diwydiant, prentisiaethau, a phartneriaethau cryf â chyflogwyr, mae colegau’n rhoi’r sgiliau sydd eu hangen ar ddysgwyr i lwyddo yn y gweithlu, gan sicrhau bod Cymru’n parhau’n gystadleuol mewn economi sy’n newid.
Mae addysg bellach yn chwarae rhan allweddol mewn cynaliadwyedd, sgiliau gwyrdd a thwf ac mae’n rhan allweddol o’n taith i Sero Net, gyda cholegau ledled Cymru yn arwain ar fentrau gwyrdd, prosiectau ynni adnewyddadwy, ac amgylcheddau dysgu ecogyfeillgar, gan baratoi dysgwyr ar gyfer y galw cynyddol am swyddi gwyrdd.
Mae colegau’n cyfrannu at gymunedau mwy diogel, mwy cynhwysol trwy hyfforddiant gwasanaethau cyhoeddus gyda llawer o ddysgwyr yn symud ymlaen i yrfaoedd mewn plismona, gofal cymdeithasol a gwaith ieuenctid. Fel porth i gyfle, mae addysg bellach yn cefnogi dysgwyr o bob cefndir trwy lwybrau dysgu hyblyg, darpariaeth ddwyieithog, a gwasanaethau cymorth wedi'u teilwra, gan sicrhau bod addysg yn parhau i fod yn hygyrch i bawb.
Yn ogystal, mae colegau addysg bellach yn chwarae rhan hanfodol wrth gryfhau gweithlu gofal iechyd Cymru, hyfforddi'r genhedlaeth nesaf o weithwyr gofal iechyd proffesiynol trwy gyrsiau arbenigol a lleoliadau ymarferol, cefnogi'r GIG a dyfodol darpariaeth gofal iechyd.
Drwy gydol yr wythnos, bydd ColegauCymru yn rhannu straeon ysbrydoledig o bob rhan o’r sector, gan amlygu cyflawniadau dysgwyr, staff, a mentrau’r coleg. Yn ystod #WythnosColegau2025, dewch i ni ddathlu pŵer addysg bellach a’i effaith gadarnhaol ar Gymru. Gyda’n gilydd, gallwn barhau i hyrwyddo rôl hanfodol colegau wrth drawsnewid bywydau a llunio’r dyfodol.
Gwybodaeth Bellach
Lucy Hopkins, Rheolwr Cyfathrebu
Lucy.Hopkins@ColegauCymru.ac.uk
