Mae ColegauCymru yn falch o fod wedi cyfrannu at waith pwysig ar y mater o aflonyddu rhywiol rhwng cyfoedion ymhlith dysgwyr ac rydym wedi ymrwymo i gefnogi’r sector addysg bellach i sicrhau amgylchedd dysgu diogel i bawb.
Rydym yn croesawu'r argymhellion a wnaed yn adroddiad Pwyllgor Plant, Pobl Ifanc ac Addysg Senedd Cymru - Mae'n effeithio ar bawb - ac rydym yn cefnogi unrhyw gamau i helpu i gadw dysgwyr yn ddiogel, gan gynnwys camau pwysig ar gasglu data ac adrodd.
Yn ein hymateb i’r ymgynghoriad, gwnaeth ColegauCymru awgrymiadau ar sut i fynd i’r afael yn ymarferol â rhai o’r heriau sy’n wynebu ein colegau ar hyn o bryd, gan godi rhai o’r materion sy’n ymwneud â chasglu a dadansoddi data, wrth bwysleisio’r angen am ymagwedd gyfannol at y mater hwn.
Cawsom ein calonogi hefyd gan ymgysylltiad y Pwyllgor â dysgwyr Coleg Cambria, gan roi cipolwg ar bryderon a phrofiadau dysgwyr ar hyn o bryd, sydd wedi llywio rhai o’r argymhellion ers hynny.
Meddai Cyfarwyddwr Polisi a Materion Cyhoeddus ColegauCymru, Dr Rachel Bowen,
“Mae’r materion a godir yn yr adroddiad hwn yn ddifrifol ac mae’n bwysig bod y sector addysg yn ei gyfanrwydd yn rhoi pwyslais o’r newydd ar gadw dysgwyr yn ddiogel, yn rhydd rhag aflonyddu rhywiol, a sicrhau bod pawb yn gallu ffynnu.
Credwn fod gan bob dysgwr yr hawl i addysg o’r radd flaenaf, a ddarperir mewn lleoliad diogel, amrywiol a chynhwysol ac o fewn sector sy’n cefnogi’r gymuned ehangach, cyflogwyr a’r economi. Rydym wedi ymrwymo i weithio gyda’r Pwyllgor Plant, Pobl Ifanc ac Addysg a rhanddeiliaid eraill i sicrhau bod ein sefydliadau addysg bellach yn lleoedd diogel a phleserus i ddysgu ynddynt.”
Gwybodaeth Bellach
Pwyllgor Plant, Pobl Ifanc ac Addysg Senedd Cymru
Mae’n effeithio ar bawb: Aflonyddu rhywiol rhwng cyfoedion ymhlith dysgwyr
Gorffennaf 2022
